Fagor Taldeak eta Bergarako energia berriztagarrien komunitateak, Berenerrek, lankidetza hitzarmena sinatu dute tokiko trantsizio energetikoa indartzeko helburuarekin. Akordioaren bidez, Fagorrek Berenerreko kapital sozialean 145.000 euroko ekarpena egingo du eta bazkide laguntzaile bihurtuko da, energia komunitatearen proiektuak sendotuz.

Hitzarmen honi esker, Bergaran energia berriztagarriaren sorkuntza-proiektu berriak martxan jartzea ahalbidetuko da, bereziki eguzki plaken instalazioen bidez. San Martin eskolan eta Osintxuko eta Labegaraietako hainbat etxebizitzatan kokatuko diren azpiegiturek herritarren autokontsumoa eta energia burujabetza sustatuko dute.

Fagorrek azpimarratu du energia komunitateek “trantsizio ekosozialean funtsezko rola” dutela, eredu energetiko demokratikoago eta jasangarriago baten alde eginez. Berenerrek, bere aldetik, hitzarmena “urrats estrategikotzat” jo du, komunitatea sendotzeko eta bazkidetza zabaltzeko.

Gaur egun, Berenerrek ehunka etxebizitzari energia berriztagarria gerturatzeko helburua du, eta lankidetza honek proiektu horien hedapena bizkortuko du Bergarako herrian.

Bergarako energia berriztagarrien komunitateak, Berenerrek, aurrerapauso esanguratsua eman du bere energia trantsizio proiektuan, dagoeneko bi instalazio fotovoltaiko martxan jarriz udalerrian.

Lehen instalazioa San Martin eskolako teilatuan gauzatu da, eta bigarrena Osintxuko auzoan kokatutako eraikin batean. Bi azpiegitura horiek eguzki-energia aprobetxatuz tokiko autokontsumoa sustatzea dute helburu, eta komunitateko kideen artean energia garbia eta gertukoa banatzea ahalbidetzen dute. 126 erabiltzaile ditu San Martingoak, eta 46 Osintxukoak.

Hortaz gain, bi instalazioak martxan izanda, Berenerren eredua zabaltzeko aukerak ikusten dituzte komunitateko kideek, eta baita bergararren artean autokontsumo partekatuaren inguruko pedagogia egiteko ere.